अद्यापही सु-याला माझा सराव नाही
अद्यापही पुरेसा हा खोल घाव नाही
येथे पिसून माझे काळीज बैसलो मी
आता भल्याभल्यांच्या हातात डाव नाही
जी काल पेटली ती वस्ती मुजोर होती
गावात सज्जनांच्या आता उठाव नाही
गर्दीत गारद्यांच्या सामील रामशास्त्री
मेल्याविना मध्याला आता उपाव नाही
उच्चारणार नाही कोणीच शापवाणी
तैसा ऋषीमुनींचा लेखी ठराव नाही
साध्याच माणसांचा एल्गार येत आहे
हा थोर गान्दुलांचा भोंदू जमाव नाही
ओठी तुझ्या न आले अद्याप नाव माझे
अन ओठ शोधण्याचा माझा स्वभाव नाही
- गझलसम्राट सुरेश भट
